Fadar Sarkin Kano, Aminu Ado Bayero, ta sanar da rundunar ’Yan Sandan Jihar Kano cewa at fara shirye-shiryen gudanar da bukukuwan Hawan Salla bayan kammala azumin watan Ramadan.
Sanarwar, wadda ta ɗauki kwanan wata 7 ga Maris, 2026, an aike ta ne ga Ibrahim Adamu Bakori, inda fadar ta bayyana cewa hawan sallar za a gudanar da shi daga fadar sarkin da ke unguwar Nassarawa a Kano.
Sakataren Sarkin, Abdullahi Haruna Kwaru, ya tabbatar da cewa Sarkin da majalisar masarautar sun amince da shirye-shiryen bukukuwan, waɗanda za su haɗa da hawan Daushe, Nassarawa, da Fanisau.
Fadar ta ce an tura wa jami’an tsaro cikakken jadawalin ranakun gudanarwa, lokaci da wuraren da za a yi hawan, tare da nuna godiya ga jami’an tsaro kan haɗin gwiwarsu wajen tabbatar da zaman lafiya a Jihar Kano.
Haka kuma, fadar ta yi addu’a domin samun nasarar gudanar da bukukuwan salla a faɗin jihar.
