Hukumar yaƙi da sha da fataucin miyagun ƙwayoyi ta Nijeriya, NDLEA, ta kama Sheleru Sadiq, tsohon kansila a yankin Orimedu da ke ƙaramar hukumar Ibeju-Lekki a jihar Lagos , bisa zargin mallakar wiwi kilo 40.
Mai magana da yawun NDLEA, Femi Babafemi, ya ce an kama Sadiq a gidansa a ranar 2 ga Maris, inda jami’an suka gano wiwi nau’in skunk kilo 40 a ɗaya daga cikin ɗakunan gidan. Ya kuma amsa cewa kayan da gidan nasa ne.
A cewar NDLEA, Sadiq wanda a yanzu yake aiki a matsayin mataimakin majalisa, ya taɓa yin wa’adin kansila sau biyu yana wakiltar al’ummar Orimedu.
A wani samame dabam, jami’an NDLEA sun kuma kama Emeka Hyginus Okwor da ƙwayoyi 1,000 na tapentadol da aka ɓoye a cikin pampers na jarirai, yayin da aka kama wani ɗan Kamaru, Mey Ali Muhamat, da miyagun ƙwayoyi a jihar Kogi .
Haka kuma jami’an sun kama Osama Abdullahi a jihar Niger bayan gano sassan na’urar fashewa (IED) guda 500 a cikin wata motar haya.
Bugu da ƙari, jami’an sun ƙwato ƙwayoyin tramadol 122,000 da gram 700 na methamphetamine a jihar Adamawa , yayin da aka kama wasu da miyagun ƙwayoyi a jihohin Kano da Ogun.
