Bayanai daga majiyoyin siyasa sun nuna cewa ɓangaren Gwamna Abba Kabir Yusuf sun amince da tsayar da Umar Haruna Doguwa a matsayin sabon Shugaban APC na Jihar Kano, a zaɓen da ake sa ran gudanarwa bayan ƙarfe 8 na dare a filin wasa na Sani Abacha Stadium.
Haka kuma, rahotanni sun nuna cewa ɓangaren tsohon gwamnan Kano, Abdullahi Umar Ganduje, sun amince da Muntari Ishaq a matsayin sabon sakataren jam’iyyar.
Sai dai a wani ɓangare, ana cewa Sanata Barau Jibrin na goyon bayan Alhaji Baba domin ya zama sabon sakataren jam’iyyar, lamarin da ke nuna yiwuwar takara mai zafi a cikin gida.
Idan za a tuna, Doguwa ya taɓa riƙe muƙamin Shugaban APC na Kano kafin a kawo Abdullahi Abbas a lokacin rikicin siyasa tsakanin Rabiu Musa Kwankwaso da Ganduje, inda a wancan lokaci Doguwa ya mara wa Kwankwaso baya.
Ana kallon wannan zaɓe a matsayin wani muhimmin mataki gabanin fara kakar siyasar 2027, inda ake sa ran za a fara zaɓen Shugaban ƙasa da ’yan majalisar tarayya tun daga watan Janairu mai zuwa.
