Ofishin Babban Mai Gabatar da Ƙara na Istanbul ya bayyana cewa an kama ɗan jaridar, Alican Uludag, ne bisa wasu rubuce-rubucensa a kafafen sada zumunta.
An ce za a gurfanar da shi a gaban masu gabatar da ƙara domin ci gaba da bincike.
DW ta tabbatar da cewa an kama Uludag a Ankara sannan aka kai shi ofishin ‘yan sanda a Istanbul.
Haka kuma an gudanar da bincike a gidansa inda aka ƙwace wasu kayan aikin fasaha.
Babbar Daraktar DW, Barbara Massing, ta bayyana
zarge-zargen a matsayin marasa tushe, tana mai cewa kama ɗan jaridar wani yunƙuri ne na tsoratarwa da kuma nuna yadda gwamnati ke tauye ‘yancin ‘yan jarida.
A cewar DW, zarge-zargen na da alaƙa da wani rubutu da Uludag ya yi a dandalin sada zumunta na X kimanin shekara da rabi da ta gabata, inda ya soki matakan gwamnatin Turkiyya da suka kai ga sakin wasu da ake zargi ‘yan kungiyar ISIS ne.
