Dakarun tsaro a Jihar Kogi sun samu nasarar ceto fasinjoji 21 da ’yan bindiga suka yi garkuwa da su, bayan sun tare jerin motocin fasinja a babban titin jihar ranar Juma’a.
Rahotanni sun ce kusan ’yan bindiga 100 ne suka kai harin, inda suka tare motocin fasinja iri-iri ciki har da Toyota Sienna daga Osogbo zuwa Kaduna, Toyota Hiace daga Owo zuwa Abuja, wata Hiace daga Abuja zuwa Ekiti, da Toyota Carina daga Lokoja zuwa Kabba.
Haka kuma wata motar Dangote mai ɗauke da buhunan siminti, da wata motar J5 cike da barkono daga Kano zuwa Lagos, suma sun fada cikin harin.
Lamarin ya faru ne da misalin ƙarfe 2:00 na rana, inda ’yan bindigar suka tilasta direbobi da fasinjoji tsayawa, suka yi garkuwa da wasu daga cikinsu.
Nan da nan dakarun soji na Brigede ta 12, sashen Quick Response, tare da jami’an NSCDC, mafarauta da masu sa kai, suka bi ’yan bindigar cikin daji. Bayan musayar wuta mai zafi, an samu nasarar ceto mutum 21, ciki har da jaririya mai kwanaki tara da haihuwa.
An ce yanzu an mika waɗanda aka ceto ga jami’an lafiya domin duba yanayin lafiyarsu.
