An gurfanar da wani matashi, Ayuba Isa, a gaban Babbar Kotun Jihar Kano da ke Audu Bako Secretariat, bisa zargin kashe abokinsa, Ibrahim Dan Larai, saboda yawan tashinsa da yake yi domin su je Sallar Asuba a garin Tumfafi, karamar hukumar Dawakin Tofa.
Bayanan da aka gabatar wa kotu sun nuna cewa lamarin ya faru ne a shekarar da ta gabata, lokacin da sabani ya barke tsakanin su, sakamakon yawan tashin da Ibrahim ke yi wa Ayuba domin su tafi masallaci. Rikicin ya kai ga Ayuba ya caka wa abokinsa wuƙa a wuya, inda ya mutu nan take.
A zaman kotun da aka yi ranar Alhamis, lauyan gwamnati, Barr. Amina Uba, ta gabatar da shaidu biyu — ASP Cindu Cuwa da Inspector Buhari — waɗanda suka bayyana yadda suka gudanar da bincike kan kisan. Jimillar shaidun gwamnati yanzu sun kai uku.
Bayan sauraron shaidu, Alƙalin kotun, Mai Shari’a Dije Abdu Aboki, ta ɗage shari’ar zuwa ranar 29 ga Janairu, 2026 domin ci gaba da sauraro.
