Rahotanni sun nuna cewa gobarar ta tashi ne a shahararriyar kasuwar sayar da kayan abinci da ke kan titin Bello Road, inda gobarar ta shafi wani gini mai hawa biyu wanda daga bisani ya ruguje sakamakon tsananin wutar.
Shaidu sun bayyana cewa wutar ta bazu cikin sauri, lamarin da ya haddasa asarar dukiyoyi na maƙudan kuɗaɗe, yayin da gobarar ta lalata shaguna da kayan kasuwanci da dama kafin jami’an kashe gobara su samu damar shawo kanta.
An bayyana cewa ’yan kasuwa da mazauna yankin sun shiga cikin firgici, yayin da jami’an Hukumar Kashe Gobara ke ci gaba da aikin ceto da kashe wutar domin hana yaduwar gobarar zuwa wasu sassan kasuwar.
Har zuwa lokacin haɗa wannan rahoto, ba a kai ga gano musabbabin tashin gobarar ba, sai dai hukumomi sun ce za su gudanar da cikakken bincike domin gano ainihin dalilin faruwar lamarin.
Babu rahoton asarar rayuka a wannan lokaci, yayin da hukumomin tsaro ke kula da lamarin tare da kira ga jama’a da su kwantar da hankalinsu.
