Adadin wadanda suka mutu a rikicin kan iyaka tsakanin Thailand da Cambodia ya kai 32, fiye da 130 sun jikkata
Jami’an Kambodiya sun bayar da rahoton cewa wasu mutane 12 sun mutu sakamakon rikicin iyaka da ke gudana da Thailand, inda adadin wadanda suka mutu a bangarorin biyu ya kai 32, yayin da ake kara fargabar cewa makwabtan kudu maso gabashin Asiya na iya fada cikin rikici mai tsawo.
Mai magana da yawun Ma’aikatar Tsaron Kasa ta Kambodiya, Maly Socheata, ya shaida wa manema labarai a ranar Asabar cewa an tabbatar da mutuwar fararen hula bakwai da sojoji biyar. An ruwaito cewa wani mutumin Kambodiya ya mutu a baya lokacin da rokokin Thailand suka buga wani haikalin Buddha da yake buya a ciki a ranar Alhamis.
Aƙalla fararen hula 50 na Kambodiya da fiye da sojoji 20 sun ji rauni, in ji mai magana da yawun Ma’aikatar tsaron kasar.
Thailand ta bayar da rahoton mutuwar fararen hula 13 – ciki har da yara – da kuma sojoji shida a cikin kwanaki biyu na fada. Bugu da kari, an raunata karin sojojin Thailand 29 da fararen hula 30 a hare-haren Kambodiya.
