Shugaban Ukraine Volodymyr Zelenskyy ya yi kira da a gurfanar da Shugaban Rasha Vladimir Putin a gaban kuliya, wanda ya zarge shi da kasancewa “mai aikata laifukan yaki” saboda kaddamar da harin Rasha kan Ukraine.
Zelenskyy ya yi kiran a daren Laraba bayan ya rattaba hannu kan yarjejeniya tare da Majalisar Turai don kafa wata kotu ta musamman da za ta gurfanar da jami’an Rasha, ciki har da Putin, saboda mamayar da suka yi wa Ukraine.
Putin yana fuskantar sammacin kamawa daga Kotun Hukunta Manyan Laifuka ta Duniya (ICC) da ke The Hague ta bayar saboda zargin laifin yaki na daukar yara ba bisa ka’ida ba daga Ukraine.
Ba a yanke shawarar inda za a kafa kotun ba tukuna, amma Zelenskyy ya ce birnin The Hague, inda ICC ke da mazauni, zai kasance “cikakke”.
