NNPP Ta Rushe Shugabancin Jam’iyyar Kano, Rikici Ya Ƙara Kamari Kan Zargin Komawar Gwamna Yusuf APC
Jam’iyyar New Nigeria Peoples Party (NNPP) ta sanar da rushe dukkan shugabannin jam’iyyar na Jihar Kano, matakin da ya zo a daidai lokacin da rikicin siyasa ke ƙara ƙamari tsakanin jagoran NNPP na ƙasa, tsohon Gwamnan Kano Sanata Rabiu Musa Kwankwaso, da Gwamnan jihar mai ci, Abba Kabir Yusuf.
Rushewar shugabancin, wanda Kwamitin Gudanarwa na Ƙasa (NWC) na NNPP ya yi, ya shafi shugabanni daga kan matakin jiha har zuwa ƙananan hukumomi. Jam’iyyar ta ce za ta kafa kwamitin rikon ƙwarya domin ci gaba da tafiyar da harkokin NNPP a Kano.
Rahotanni daga kafofin watsa labarai sun bayyana cewa wannan mataki na da alaƙa da jita-jitar cewa Gwamna Abba Kabir Yusuf na dab da sauya sheƙa zuwa jam’iyyar APC, lamarin da ake cewa Kwankwaso da magoya bayansa na nuna adawa da shi.
Duk da cewa Gwamna Abba Yusuf bai fitar da sanarwa a hukumance ba kan batun sauya sheƙar, masu nazarin siyasa na ganin cewa rikicin da ke tsakanin manyan jiga-jigan NNPP na iya zama babban sauyi ga siyasar Kano, musamman yayin da ake kallon Kano a matsayin jiha mai matuƙar tasiri a zaɓen ƙasa.
Masu lura da al’amuran siyasa na bayyana rushe shugabancin jam’iyyar a matsayin matakin ladabtarwa da kuma ƙoƙarin hana rugujewar NNPP a Kano, yayin da wasu ke ganin hakan na iya ƙara rarrabuwar kai a cikin jam’iyyar.
Ana sa ran NNPP za ta ƙara bayyana matsayinta a fili a kwanaki masu zuwa, yayin da ake ci gaba da sa ido kan makomar Gwamna Abba Kabir Yusuf da tasirin wannan rikici ga siyasar Kano da ma Najeriya baki ɗaya.
