Tinubu Ya Bukaci Kafafen Yaɗa Labarai Su Rika Sanya Ido Kan Kuɗaɗen Jihohi da Ƙananan Hukumomi
Shugaban ƙasa, Bola Ahmed Tinubu, ya buƙaci kafafen yaɗa labarai su ƙara sanya ido kan yadda gwamnatocin jihohi da ƙananan hukumomi ke tafiyar da kuɗaɗen da suke karɓa, kamar yadda suke sa ido kan ayyukan gwamnatin tarayya.
Tinubu ya bayyana hakan ne ranar Juma’a yayin da ya karɓi bakuncin mamallaka kafafen yaɗa labarai da manyan editoci a fadar Aso Rock Presidential Villa da ke Abuja.
Shugaban ya ce bayan wasu sauye-sauyen da aka aiwatar, ƙananan hukumomi yanzu suna karɓar kuɗaɗensu kai tsaye, don haka ya dace kafafen yaɗa labarai su rika sa ido kan yadda ake amfani da kuɗaɗen domin tabbatar da gaskiya da riƙon amana.
Ya ƙara da cewa sauye-sauyen da gwamnatinsa ta aiwatar sun taimaka wajen inganta kuɗaɗen shiga na jihohi, inda ya bayyana cewa a halin yanzu babu wata jiha da ke karɓar bashi domin biyan albashin ma’aikatanta.
Tinubu ya danganta ƙarin kuɗaɗen shiga ga jihohi da ƙananan hukumomi da karuwar samar da ɗanyen mai, ingantaccen tsarin tattara haraji da kuma hukuncin da Supreme Court of Nigeria ta yanke a shekarar 2024 wanda ya bai wa ƙananan hukumomi ’yancin cin gashin kansu na kuɗi.
Haka kuma shugaban ya gode wa kafafen yaɗa labarai kan sukar da suke yi wa gwamnatinsa, yana mai cewa hakan na ƙara masa ƙwarin gwiwa wajen yin aiki tukuru.
Ya ce karanta jaridu a kowace safiya ya zama wata al’ada a gare shi, yana mai jaddada muhimmancin aikin jarida wajen inganta dimokuraɗiyya.
