Wani babban jami’in tsaron ƙasar Iran, Ali Larijani, ya yi gargaɗi ga shugaban Amurka, Donald Trump, inda ya ce ya kamata ya yi hankali domin kada a kai ga “kawar da shi daga duniya”.
Larijani ya bayyana hakan ne a wani saƙo da ya wallafa a shafin X, inda ya ce Iran ba ta tsoron abin da ya kira barazanar Trump mara amfani.
A cewarsa, “Ko waɗanda suka fi ka ƙarfi ba su iya kawar da al’ummar Iran ba,” yana mai ƙara da cewa ya kamata Trump ya yi taka-tsantsan domin kada a kai ga kawar da shi daga duniya.
Kalaman na Larijani sun zo ne bayan Trump ya yi barazana a dandalinsa na Truth Social cewa Amurka za ta ƙara tsaurara hare-harenta kan Iran idan ba ta buɗe mashigar Strait of Hormuz ba, wadda ke da matuƙar muhimmanci wajen safarar man fetur a duniya.
