Magoya bayan Kwamishinan Yaɗa Labarai na Jihar Kano, Ibrahim Abdullahi Waiya, sun ci gaba da nuna bacin ransu kan yadda aka naɗa shi memba kawai a Kwamitin Yaɗa Labaran Karɓar Gwamna Abba Kabir Yusuf zuwa jam’iyyar APC.
Rahotanni sun nuna cewa rikicin ya fi bayyana a kafafen sada zumunta, musamman a shafin Facebook, inda magoya bayan Waiya ke wallafa saƙonni da sharhi suna bayyana rashin jin daɗinsu kan tsarin kwamitin.
A cewar su, ya kamata a bai wa Waiya shugabancin kwamitin duba da matsayinsa na Kwamishinan Yaɗa Labarai a gwamnatin Kano.
An dai naɗa tsohon Kwamishinan Yaɗa Labarai, Malam Muhammad Garba, a matsayin Shugaban Kwamitin, yayin da Daraktan Janar na Yaɗa Labarai da Hulɗa da Jama’a na Gidan Gwamnatin Kano, Sunusi Bature Dawakin Tofa, aka naɗa a matsayin Sakataren kwamitin.
Wasu daga cikin magoya bayan jam’iyyar na kallon matakin a matsayin raini ko rashin la’akari da rawar da Waiya ke takawa, lamarin da ya janyo ce-ce-ku-ce a tsakanin mabiya APC a jihar.
Tuni dai magoya bayan Kwamishinan suka fara kira ga shugabannin jam’iyyar da su sake duba tsarin kwamitin domin kauce wa rikici da rarrabuwar kai a cikin jam’iyyar.
