Jami’an agajin gaggawa na Red Cross sun bayyana cewa ana fargabar adadin mutanen da ƴan bindiga suka kashe a Jihar Kwara ya kai kusan 70, biyo bayan wani mummunan hari da aka kai ƙauyen Woro.
Red Cross ta ce har yanzu akwai mutane da dama da ba a gano inda suke ba, tun bayan harin da ƴan bindigar suka kai, inda suka kuma banka wa shaguna wuta tare da ƙone gidan sarkin gargajiya na yankin.
A wani lamari na daban, rahotanni daga Jihar Katsina sun nuna cewa aƙalla mutum 21 daga cikin mazauna ƙauyuka sun rasa rayukansu sakamakon hare-haren ƴan bindiga.
A martanin da ta bayar, Gwamnatin Tarayyar ta ce za ta ƙara ƙaimi wajen kare rayuka da dukiyoyin al’umma, a daidai lokacin da hare-haren kan fararen hula ke ƙaruwa a sassan arewa da tsakiyar ƙasar.
