Gwamnan Jihar Kano, Injiniya Abba Kabir Yusuf, ya tabbatar da kudirin gwamnatinsa na tabbatar da adalci, inganta ayyukan raya kasa da kuma kyakkyawan shugabanci, a wani biki na bayar da kyaututtuka da kungiyar CREED ta shirya a Tropical Galeria, Kano
A jawabin da kwamishinan shari’a kuma Attonery General na jihar, Barr. Abdulkarim Kabiru Maude (SAN), ya gabatar a madadin gwamnan, an bayyana kokarin gwamnati wajen gyaran harkokin shari’a, musamman sake duba masu tsawon zama a wuraren kebe ba tare da shari’a ba, wanda ya gano wadanda suka shafe shekaru ba tare da shari’a ko lauyan kare su ba.
Gwamnan ya ce an dauki matakai cikin gaggawa wajen nemo fayil-fayil da suka bata, bayar da shawarar shari’a, da sakin wadanda suka cancanci samun ’yanci bisa adalci.
Haka kuma ya bayyana ci gaba da ake samu a fannoni daban-daban, irin su gyaran hanyoyi, inganta samar da ruwa, habaka makarantu da asibitoci, da kuma aikin sabunta birni domin gina Kano mafi tsari, tsabta da aminci.
An halarci taron tare da wasu manyan jami’an gwamnati da Sarkin Gaya, Alhaji (Dr.) Aliyu Ibrahim Abdulkadir.
A karshe, Gwamna Yusuf ya samu kyautar Gwamnan Shekara ta 2025 daga CREED Magazine saboda namijin kokarinsa a fannin sabunta birni da ingantaccen shugabanci.
Sanarwar ta fito ne daga Sunusi Bature Dawakin Tofa, Darakta Janar na Yada Labarai na Gidan Gwamnati Kano.
