Kungiyar ‘Yan Jarida ta Najeriya (NUJ), reshen Jihar Kano, ta dakatar da Sakataren ta, Abubakar Shehu Kwaru, bayan tuhumar aikata ba daidai ba ta fuskar gudanarwa da kuma almundahanar kuɗi.
An yanke wannan hukunci ne a taron Congress na biyu da aka gudanar ranar Asabar, 29 ga Nuwamba, 2025. Dakatarwar ta ba da damar gudanar da bincike ba tare da tangarda ba ta hannun Kwamitin Ladabtarwa da Ka’idoji, wanda zai gabatar da rahotonsa bayan kammalawa.
A cikin sanarwar bayan taron da Shugaban Majalisar, Kwamared Suleiman Abdullahi Dederi, tare da Sakatariyar riko, Hauwa Suleiman Zaharaddeen, suka sanya wa hannu, NUJ ta jinjinawa Gwamnan Kano, Abba Kabir Yusuf, saboda fifita tsaro a kasafin kudin 2026 da kuma bai wa sojoji motocin aiki da babura domin inganta tsaro.
Kungiyar ta bukaci hukumomin tsaro su kara jajircewa wajen kare rayuka da dukiyoyin jama’a, tare da kira ga al’umma su ba da hadin kai ga jami’an tsaro.
A bangaren wasanni, NUJ ta bukaci a yi garambawul ga kungiyar Kano Pillars domin dawo da karfinta a kwallon kafa ta Najeriya.
Kungiyar ta kuma gode wa Gwamna Yusuf bisa kyautata yanayin da ‘yan jarida ke gudanar da aikinsu ba tare da tsangwama ba.
Haka zalika, an jinjinawa Kwamishinan Yada Labarai, Alhaji Ibrahim Abdullahi Waiya, saboda kafa Kungiyar Manyan ‘Yan Jarida tare da karfafa alaka da ‘yan jarida na yanzu.
Taron ya bukaci kafafen yada labarai su kiyaye ka’idojin aikin jarida, musamman wajen yin fassara daidai da kuma furta sunaye da mukamai cikin ingantacciyar Hausa. Haka kuma ya gargadi ‘yan jarida da su guji yada bayanan da ke karfafa ‘yan ta’adda.
NUJ ta yi kira ga Hukumar Kwana-Kwana ta Jihar Kano da ta kara wayar da kan jama’a kan hanyoyin kauce wa gobara.
An kuma gode wa Daraktan Yada Labarai na Gwamna, Sunusi Bature Dawakin Tofa, bisa daukar nauyin kudin jinya na dattijon dan jarida, Malam Lawan Isah Bagwai, da taimakon sauran mambobin da ke fama da rashin lafiya.
Kungiyar ta yaba wa jagorancin Kwamared Dederi bisa gudanar da Press Week cikin nasara daidai da tsarin NUJ.
