Hukumar Kwana-Kwana ta Jihar Kano ta tabbatar da mutuwar mutane uku, yayin da wani mutum ɗaya ya tsira da raunuka sakamakon gobara a wasu abubuwa biyu dabam da suka faru ranar Juma’a.
Hatsarin na farko ya faru ne misalin ƙarfe 1:30 na rana, lokacin da wani tankar man fetur mai dauke da lita 30,000 ta kife a wajen kasuwar Kura, kan titin Zariya, sannan ta kama da wuta. Rahotanni sun nuna cewa tankar mai lambar rijistar NGZ 250 XA ta buge wani mai mashin kafin ta kama wuta.
Hukumar ta bayyana cewa ta samu kiran gaggawa daga wani jami’in Civil Defence mai ritaya, Danlami Muhammad, wanda ya sanar da afkuwar lamarin, lamarin da ya sa aka tura motar kashe gobara daga hedikwatar hukumar.
“Da jami’anmu suka isa wurin, sun tarar da tankar gaba ɗaya ta ci wuta. Mutane huɗu ne abin ya rutsa da su; an ceto uku ba su da hayyaci amma daga baya aka tabbatar da mutuwarsu, yayin da mai mashin ɗin ya tsira,” in ji sanarwar.
