Tsohon Gwamnan Jihar Kano kuma tsohon Shugaban Jam’iyyar APC na ƙasa, Dr. Abdullahi Umar Ganduje, ya ƙalubalanci kiran da gwamnatin Kano ta yi na a kama shi, yana mai cewa wannan kira “maras tushe ne, sakaci ne, kuma rashin kwarewa.”
A wata sanarwa da mai magana da yawunsa, Edwin Olofu, ya fitar a ranar Juma’a, Ganduje ya musanta zargin cewa ya yi magana kan kafa rundunar ta’adda, yana mai cewa wannan tuhuma ta siyasa ce kawai ba tare da wani hujja ba.
Ya zargi gwamnatin Abba Kabir Yusuf da kasa aiwatar da nauyin da ya rataya a wuyanta na kare rayuka da dukiyoyin jama’a, musamman a yankuna kamar Bagwai, Shanono da Tsanyawa, inda ake fama da matsalolin tsaro.
Ganduje ya ce maimakon gwamnati ta magance matsalolin tsaro, tana nemowa kanta abin fakewa:
“Gwamna Yusuf yana kaucewa matsalolin tsaro suna ta’barɓarewa, yana kuma neman wanda zai rufe gazawarsa,” in ji sanarwar.
Tsohon gwamnan ya kara da cewa ba shi da alaka da wani abu da zai iya tada rikici, yana kuma tunawa da cewa gwamnatinsa ta shekaru takwas ta samu yabo saboda tabbatar da tsaro a Kano.
Ya yi kira ga Gwamna Yusuf da ya maida hankali kan aikin da kundin tsarin mulki ya dora masa, maimakon “rawar siyasa da zarge-zargen banza.”
Sanarwar ta ƙare da cewa jagoranci yana bukatar aiki, jajircewa da nuna tausayi — ba fito-na-fito da bayanan kafofin watsa labarai kawai ba.
