Mataimakin Shugaban Majalisar Dattawa, Sanata Barau I. Jibrin, ya yi kira ga Gwamna Abba Kabir Yusuf na Jihar Kano da ya daina siyasantar da al’amuran tsaro, yana mai cewa bukatar hadin kai ce kawai za ta magance matsalolin da ke addabar jihar.
Sanata Barau ya bayyana hakan ne yayin da yake maida martani kan zargin da gwamnatin Kano ta yi cewa wasu kalamansa na iya kawo cikas ga kokarin da ake yi na tabbatar da tsaro a jihar. Zargin ya taso ne daga bayan taron majalisar zartarwa ta jihar karo na 34.
A wata sanarwa da mai taimaka masa kan yada labarai, Ismail Mudashir, ya fitar, Sanata Barau ya ƙaryata ikirarin gwamnatin jihar, yana kalubalantar ta da ta gabatar da bidiyon da ke nuna cewa ya yi wata magana da za ta iya dagula tsaron Kano.
Ya ce matsalolin tsaro a fadin Najeriya, ciki har da matsalolin ‘yan daba a wasu yankuna na Kano, suna bukatar hadin kai daga duka bangarori, ba siyasantar da batun ba.
