Shugaban Hukumar Ciniki da Masana’antu ta Jihar Kano (KACCIMA), Ambasada Hamsa Usman Darma, ya bayyana cewa ana sa ran karɓar bakuncin ƙarin kamfanoni daga sassa daban-daban na duniya a bana, yayin da ake cigaba da shirye-shiryen baje kolin kasa da kasa.
Ambasada Darma ya bayyana haka ne a hirarsa da ’yan jarida a ofishinsa da yammacin yau, inda ya ce baje kolin na bana ya zo da sabon tsari, domin an sami karuwar kamfanoni masu sha’awar shiga da nuna kayayyaki a kolin.
Ya ce cigaban ya samo asali ne daga ingantattun shirye-shiryen da hukumar ta gudanar, da kuma kyautata tsaro da manufofin kasuwanci da gwamnatin Kano ke aiwatarwa, wanda hakan ya ƙara jawo hankalin masu zuba jari daga cikin gida da waje.
Shugaban hukumar ya kuma yi godiya ga Gwamnatin Jihar Kano, hukumomin tsaro, manya da ƙananan ’yan kasuwa, da kuma masu halartar baje kolin domin sayen kayayyaki, bisa rawar da suke takawa wajen tabbatar da baje kolin ya ci gaba da samun nasara da bunƙasa.
