Gwamnatin Jihar Kano ta zargi tsohon gwamnan jihar, Dr. Abdullahi Umar Ganduje, da mataimakin shugaban majalisar dattawa, Sanata Barau Jibrin, da yin kalaman da ake ganin na iya tunzura ’yan ta’adda su kai hare-hare a wasu yankunan jihar.
Wannan zargi ya fito ne daga zaman Majalisar Zartarwa ta jihar da Gwamna Abba Kabir Yusuf ya jagoranta, inda aka bayyana cewa wasu kalaman da Ganduje da Barau Jibrin suka yi kan rashin tsaro a jihar sun yi kama da na hura wutar rikici.
A baya-bayan nan, tsohon gwamnan Ganduje ya yi tsokaci kan halin rashin tsaro, inda ya ce gwamnatin Abba Kabir Yusuf ta kasa kare rayuka da dukiyoyin mazauna jihar. Sai dai gwamnatin jihar ta ce kalaman sun wuce gona da iri, suna iya jan hankalin ’yan ta’adda, lamarin da ke barazana ga zaman lafiya.
Gwamnatin ta yi kira ga hukumomin tsaro da su dauki matakin gaggawa wajen bincike da hana duk wani yunkuri da zai jefa tsaro cikin hadari, tare da tabbatar da cewa za a hukunta duk wani da ya yi tunzura ’yan ta’adda ko kawo tashin hankali a jihar.
