Katsina, 5 ga Oktoba 2025 —
Hukumar Hisbah ta ƙaramar hukumar Katsina ta gudanar da wani samame a cikin garin Katsina, inda ta kama mata fiye da goma da ake zargi da aikata karuwanci, tare da maza biyu da ke tare da su.
Kwamandan Hisbah na ƙaramar hukumar, Malam Shamsu Kabir, ne ya bayyana hakan cikin wata sanarwa da ya fitar a ranar Lahadi, yana mai cewa samamen ya gudana ne da daddare a sassa daban-daban na birnin.
Ya ce an gudanar da aikin ne bayan samun rahotannin sirri daga mazauna yankuna da suka koka kan yadda wasu wurare suka zama cibiyoyin aikata laifuka masu sabawa koyarwar addinin Musulunci.
“Mun gudanar da wannan samame ne bayan samun bayanai daga jama’a. Wannan wani ɓangare ne na yunkurinmu na kare tarbiyya da mutuncin al’umma,” in ji Malam Shamsu.
Kwamandan ya ƙara da cewa hukumar ta kuma mika wani yaro daga Jos ga iyayensa bayan gano cewa wasu masu damfara ne suka kawo shi Katsina da nufin amfani da shi wajen aikata laifi.
“Mun tabbatar da cewa an dawo da yaron ga iyayensa lafiya bayan kammala bincike. Hisbah za ta ci gaba da irin waɗannan matakai domin kare al’umma daga miyagun ayyuka,” in ji shi.
Hukumar Hisbah ta tabbatar da cewa za ta ci gaba da gudanar da samame lokaci zuwa lokaci don tabbatar da bin ka’idojin tarbiyya da koyarwar Musulunci, tare da tabbatar da zaman lafiya da mutunci a cikin al’umma.
—
Rahoto daga:
Ahrasjo News – Sashen Tsaro da Harkokin Addini
