Mai Alfarma Sarkin Musulmin Najeriya, Alhaji Muhammad Sa’ad Abubakar III, ya bayyana damuwarsa kan yadda tsarin shari’a a ƙasar ke taɓarɓarewa, inda ya ce a halin yanzu masu kuɗi ne kaɗai ke samun galaba a kotu, yayin da talakawa ke asarar haƙƙoƙinsu.
Sarkin Musulmi ya yi wannan jawabi ne a yayin taron ƙungiyar lauyoyin Najeriya (NBA) da aka gudanar a birnin Enugu. Ya bayyana cewa shari’a a Najeriya na neman komawa irin tsarin “dai dai kuɗin ka, dai dai shagalin ka”, saboda yadda masu hannu da shuni ke sayen alkalai domin samun nasara, alhali kuma talakawa ba sa samun adalci.
Ya ce irin wannan yanayi ne ya sa masu kuɗi da manyan ‘yan siyasa ke aikata laifuka ba tare da fargaba ba, domin sun san babu wani abin da zai faru da su.
Sarkin Musulmi ya nuna bacin ransa kan yadda mutunci da kimar alkalai ke ta ci gaba da zubewa, inda ya bukaci lauyoyi – waɗanda ya bayyana a matsayin muhimman ginshiƙan shari’a – da su ɗauki matakan gaggawa domin dawo da martabar wannan bangare.
Ya yi kira ga lauyoyin da su tabbatar da gaskiya da adalci ga kowa da kowa, ba tare da nuna bambanci tsakanin masu kuɗi da talakawa ba. Ya kuma bukace su da su yi amfani da wannan taro wajen tattauna manyan matsalolin da ke addabar bangaren shari’a tare da samar da mafita da za ta inganta aikin su.
A cewarsa, idan aka yi aiki yadda ya kamata, shari’a za ta dawo da martabarta a idanun jama’a tare da kawo ƙarshen matsalar shugabanci da ta addabi Najeriya.
