Wasu da ake zargin ’yan kungiyar asiri ne sun harbe basaraken yankin Obelle da ke Karamar Hukumar Emohua ta Jihar Ribas, Cif Ferdinand Dabiri, har lahira a yayin da ake tsaka da wani taro.

Cif Ferdinand da aka kashe ana tsaka da taron sarakunan yankin, shi ne Mataimakin Shugaban Majalisar Sarakuna ta karamar hukumar.

Harin ya tilasta wa sarakunan da suka halarci zaman tserewa domin kubutar da rayuwarsu, a yayin da al’ummar yankin suka shiga zullumi.

Dan mamacin mai suna Joseph Dabiri, ya shaida wa manema labarai cewa, “Na samu labarin cewa wani matashi ne ya je wajen mahaifina ya harbe shi sau biyu da bindiga a kauyen Umuwoka, sannan ya tsere.”

Yace tuni suka kai rahoton kisan ga Babban Ofishin ’Yan Sanda na yankin Rumuji, yana mai kira da a yi musu adalci.

Zuwa lokacin da aka hada wannan rahoton dai rundunar ’yan sandan jihar ba ta fitar da wata sanarwa game da faruwar lamarin ba.