Jaridar Daily Trust ta ruwaito cewa lamarin da ya faru da safiyar Asabar ya haddasa firgici a yankin da abin ya auku, inda jami’an tsaro da na agaji suka gaggauta isa wurin.
Kwamishinan ‘yan sanda na jihar Kano, Ibrahim Adamu Bakori, wanda ya isa wurin da abin ya faru ba da jimawa ba bayan fashewar, ya bayyana cewa fashewar na iya zama ta bam ɗin soja (military ordnance) da ba a sarrafa ko ɗauka yadda ya kamata ba.
> “Na samu kiran gaggawa cewa wani abu mai girma ya faru. Da na isa, sai na ga cewa ana zargin wani bam ne ya fashe — mai yiyuwa bam ɗin soja ne. Mutane goma sha biyar sun ji rauni, sannan abin takaici ya kashe mutane biyar,” in ji shi.
Ya ƙara da cewa an garzaya da waɗanda abin ya shafa zuwa asibitoci mafi kusa domin kula da su.
> “Har yanzu ana bincike kan lamarin, amma rahotannin farko sun nuna cewa wata mota daga jihar Yobe ce ke ɗauke da kayan fashewar,” in ji shi.
Kwamishinan ya ce akwai alamun cewa tirela ce ke ɗauke da kayan fashewar, amma har yanzu ba a tabbatar ko ma’aikatan soja ne ko kwangiloli ne ke tuka ta ba.
> “Hukumomin tsaro na gudanar da bincike. Bayan binciken ne za a samu cikakken bayani. Muna kira ga jama’a da su kwantar da hankalinsu,” in ji shi.
Allah ya jikan wadanda suka mutu, ya ba wa wadanda suka jikkata sauki.
