DA DUMI-DUMI: Shugaban Iran Ayatollah Khamenei Ya bayyana mutanan da zasu gajeshi idan an kasheshi
Shugaban addini na Jamhuriyar Musulunci ta Iran, Ayatollah Ali Khamenei, ya tanadi wasu mutum uku da za su iya maye gurbinsa idan har aka kashe shi ta hanyar kisan gilla daga Amurka ko Isra’ila da wakilansu.
Jaridar The New York Times ta ruwaito cewa, saboda fargabar kisan gillar, shugaban addinin yana magana da manyan kwamandojinsa ne ta hanyar amintaccen wakili kawai, yana kuma guje wa amfani da na’urorin sadarwar lantarki domin hana a gano inda yake.
Wani bayani daga wasu jami’an Iran guda uku da suka san da shirye-shiryen yaki na gaggawa na shugaban addinin ya tabbatar da wannan ci gaban ga wani ɗan jarida.
Yayin da yake buya a wani rami na tsaro, Ayatollah Khamenei ya zabi wasu magada daga cikin jerin manyan hafsoshin sojinsa a matsayin waɗanda za su iya jagorantar al’umma idan har wasu daga cikin manyan mukarrabansa sun mutu.
A wani mataki mai ban mamaki, jami’an sun ƙara da cewa, Ayatollah Khamenei ya naɗa manyan malamai uku na addini a matsayin masu yiyuwar gado idan an kashe shi — alamar da ta fi bayyana halin hatsarin da mulkinsa na shekaru fiye da talatin ke ciki a wannan lokaci.
Ayatollah Khamenei, mai shekaru 86, yana da cikakken sani cewa Isra’ila ko Amurka na iya ƙoƙarin kashe shi, kuma irin wannan kisa zai dauka a matsayin shahada, in ji jami’an.
