Da take jawabi a wani taron kwana guda ga ‘yan jarida, Manajan Shirye-shirye na rikon ƙwarya na PWAN, Aisha Isa-Yusuf, ta ce an shirya taron ne domin wayar da kan kafafen yaɗa labarai kan tanade-tanade da muhimman sauye-sauyen da Dokar Police Act 2020 ta ƙunsa.
A cewarta, shirin na da burin ƙara wayar da kai kan gyare-gyaren da ake yi a harkar tsaro, ƙarfafa bin doka da oda, da kuma gina al’umma marar tashin hankali.
“Mun shirya wannan horo ne domin sanar da ‘yan jarida sabbin tanade-tanaden Dokar ‘Yan Sanda ta 2020 da sauye-sauyen da ta kawo, domin samar da al’umma mai aminci da ladabtarwa,” in ji ta.
Ta bayyana ‘yan jarida a matsayin muhimman masu ruwa da tsaki, inda
Ta buƙaci ‘yan jarida da su ƙara wayar da kan jama’a kan sabbin tanade-tanaden dokar, tana mai cewa dokar ta kawo sauye-sauye domin kare haƙƙin bil’adama, mutuncin waɗanda ake zargi da laifi, da kuma kare rayuka da dukiyoyi.
Ta ƙara da cewa dokar ta haramta kama mutum a madadin wani (arrest in lieu), ta hana ‘yan sanda tsoma baki a rikice-rikicen farar hula ko na kwangila, sannan ta tabbatar da cewa mata da suka cika sharuddan beli ba za a hana su beli ba.
Isa-Yusuf ta kuma jaddada muhimmancin aikin jarida na bincike da kuma rahoton da ke ba da mafita (solutions journalism), domin sa ido kan ayyukan ‘yan sanda a matakin ƙasa da tabbatar da gaskiya da riƙon amana.
Ta shawarci ‘yan jarida da su riƙa tantance bayanai ta hanyar sahihan hanyoyi, su ci gaba da bibiyar shari’o’i har zuwa yanke hukunci, tare da amfani da kafafe daban-daban wajen isar da saƙo.
Shi ma ɗaya daga cikin masu gabatarwa, Odoh Okenyodo, ya jaddada buƙatar rahoton ci gaba da rahoton da ke ba da mafita wajen magance ƙalubalen aikin ‘yan sanda.
Ya ce bai kamata a daina aikin jarida na bincike ba, sai dai a ƙara amfani da salon da ke neman mafita domin magance matsalolin tsaro.
A nasa ɓangaren, Aro Leonard ya buƙaci ‘yan jarida da su yi amfani da tasirinsu wajen inganta gaskiya da sauye-sauye a tsarin aikin ‘yan sanda ta hanyar rahoto mai daidaito da gaskiya.
PWAN dai ƙungiya ce mai jagorancin mata wadda ke aiki domin ƙarfafa shigar jama’a cikin harkokin shugabanci, inganta tsarin tsaro, da kare haƙƙin al’umma a Najeriya da yammacin Afirka.
Shirin horon na samun tallafi daga Foreign, Commonwealth and Development Office (FCDO UKaid), a ƙarƙashin aikin da ake kira:
“Ƙarfafa Amincewar Jama’a da Tsarin ‘Yan Sanda Mai La’akari da Jinsi a Najeriya ta Hanyar Ingantacciyar Aiwarar Dokar Police Act 2020,” wanda ake aiwatarwa a dukkan shiyyoyin siyasa shida na ƙasar.
