Abuja – Litinin, 20 Oktoba 2025:
Jami’an tsaro sun tsaurara matakan tsaro a manyan hanyoyin shiga babban birnin tarayya Abuja, bayan barkewar zanga-zanga da ake gudanarwa domin neman a sako jagoran ƙungiyar IPOB, Nnamdi Kanu.
Rahotanni sun tabbatar da cewa Rundunar Sojin da ke tsaron shugaban ƙasa tare da ’Yan Sanda sun kafa shingayen bincike a muhimman hanyoyi kamar Bwari, Zuba, Nyanya da Ushafa, domin tabbatar da tsaron al’umma da hana masu tayar da fitina shiga cikin birnin.
Majiyoyi daga hukumomin tsaro sun ce matakin ya biyo bayan rahotannin da ke cewa ana zargin wasu manyan sojoji da shirin juyin mulki tare da wani tsohon gwamna, duk da cewa Hedikwatar Tsaro ta musanta wannan zargi, tana mai cewa ana gudanar da bincike don tabbatar da gaskiya.
A safiyar Litinin, Omoyele Sowore, jagoran tafiyar #RevolutionNow, ya jagoranci zanga-zanga a wasu sassan Abuja, lamarin da ya haddasa cunkoson ababen hawa da tsaiko a hanyoyin shiga birnin.
Wasu direbobi da fasinjoji sun koka kan tsaikon da aka samu, inda suka ce tsauraran matakan sun jawo cunkoso mai tsanani, musamman a yankunan Nyanya da Ushafa.
Jami’an tsaro sun ci gaba da sanya idanu a muhimman wurare irin su Fadar Shugaban Ƙasa, Majalisar Tarayya, Kotun Daukaka Ƙara da Eagle Square, domin tabbatar da zaman lafiya da kare dukiyoyin jama’a.
Wani jami’in tsaro ya bayyana cewa, “Ana binciken kowace mota da ke shigowa birnin domin tabbatar da cewa babu masu shirin tada tarzoma ko aikata laifi.”
—
📰 Ahrasjo News
Labaran gaskiya don cigaban al’umma.
